RECUEIL DES EXEMPLES DE LA MALICE DES FEMMES. Et des malheurs venus à leur occasion. _Ensemble les execrables cruaultez exercees par icelles._ [TENDIT URSUM] A PARIS, Chez Pierre HURY, au mont S. Hylaire, à la Cour d'Albret. M. D. XCVI. RECUEIL DES EXEMPLES DE LA MALICE DES FEMMES. Si j'entreprenois de descrire les malheurs que le genre feminin a faict clairement veoir à noz yeux depuis tant de siecles Je me trouverois enfermé en un labyrinthe plus cruel que celuy du Roy Minos preparé pour les enfans d'Athenes qui luy estoient envoyez en tribut, ainsi que le racomptent les historiens de ce temps là, Et demeurerois presque accablé soubz le faix d'une si pesante charge & une si extreme quantité d'Exemples qui se trouvent sur ce subject. Car il n'y a Poete ancien ou moderne de qui les livres ne soient remplis de tant de prodigieuses cruautez que le Jugement nous fault, la veue nous esblouyt, & tous les sentimens nous defaillent, voyans tant de tragiques malheurs advenuz & qui adviennent tous les jours par les femmes, comme les exemples en servent d'un beau miroir pour nos les representer devant les yeux. Et semble que toutes les imperfections ayent voulu s'incorporer en un, expres pour former la femme & en rendre du tout odieux l'object. Lequel voilé d'une beauté falsifiee ravit tellement les sens & l'entendement de ceulx qui s'y mettent trop avant que la sortye leur en est interdite, & se pensent bien-heureux d'avoir la veue de ce qui cause leur mal. Une femme est toute pleine de vanité, d'inconstance, de fraulde, de perfidie de cruaulté, deception & mille autres vices que je ne veux nommer, qui la conduisent ordinairement au precipice de sa ruyne, & ceulx qui les suyvent, voila que c'est, nous l'aymons comme bien souvent le mallade choisit & demande plustost la chose qui luy peust nuyre que ce qui luy est profitable, nous en sommes de mesmes: car voyans une femme qui nous plaist, il la faut avoir, il faut employer ses amis à un si mauvais affaire comme pour demander une femme vous vous soubmettez a des choses irraisonnables pour l'avoir & aucunesfois elle se moque de vous, s'il advient que vous l'ayez vous vous en resjouyssez comme si vous y aviez gaigné un Royaume helas pauvre homme tu ne sçais ce que tu faicts, tu es aliené d'entendement tu ne congnois pas que tu meines en ta maison le serpent qui te devorera puis apres, tu es doncq malade du sens de l'entendement & de la raison cherchant le poison qui te fera mourir lentement pour te donner plus de peine, ce pendant tu l'aymes c'est le comble de ta felicité tu penses ja estre vollé jusques au tiers ciel, & tu metz desja un pied dans la fosse. Voila comme tu es endormy d'un sommeil si pernicieux si tu te resveilles tu recognois ta faute (helas mon amy) c'est bien tard: tu es lié, il fault demeurer là, C'est pourquoy ordinairement quand l'on veult arrester quelque jeune homme on dict qu'il le fault marier vous voila donc prins, il fault penser à d'aultres choses qu'a estre libre, croiriez vous bien (mon amy) que aucunesfois une fille prenne un homme par amitié? nenny, c'est le plus souvent pour l'argent que le bon homme peult avoir & aulcunesfois elle le prend a faulte d'aultre & de craincte de demeurer vieille fille. Et que leur beaulté se venant a flestrir & fener, elles demeurassent sans party, il fault prendre la fortune par sa chevelure de devant, car elle est chauve derriere & si vous faillez une fois à la prinse la poursuitte sera vayne puis apres, & d'aultre part s'il advient que le mary ne puisse fournir a l'appoinctement selon qu'elle pense meriter pour son jeune aage ou selon son appetit, elles scavent le moyen qu'il faut tenir pour ne sen laisser avoir faulte, & puis scavent palier le faict que le bon homme ne s'en pourra appercevoir aulcunement, car elles ayant l'esprit subtil & cault, il ne leur manque poinct d'excuses comme de venir veoir son pere, ses cousins, ses parens, sa commere qui est accouchee, ou de devotion, puis avecques cela elles saultent au col de leurs sots marys, le baisent luy jurent qu'elles l'ayment mieulx que leur propre vie. Mais c'est au plus loing de leur pensee, car elles le vouldroient veoir pendu, puis tant d'aultres belles parolles qu'elles y scavent adjouster que c'est une chose incroyable pour abuser les pauvres gens. Aussi Thales l'un des sept saiges de grece recongnoissant cela s'en exempta, car voulant monster a l'homme qu'il n'estoit bon de se marier, quelqu'un l'interogeant ainsi qu'il estoit encores en la fleur de son aage pourquoy il ne se marioit, disoit qu'il n'estoit pas encores temps puis devenu sur l'age interogé de la mesme chose, il n'est plus temps dict-il, voulant monstrer par là a l'homme qui veult demeurer a son ayse franc de tout soucy il ne fault poinct qu'il s'accompaigne d'une chose si pernicieuse & qui trouble plus le repos comme est la femme, toutesfois je ne parle que de celles qui se trouvent le plus communement, car je ne veulx pas nier qu'il n'y en aye de bonnes car parmy un si grand nombre il n'est pas qu'il ne s'en trouve quelqu'une qui aye un peu plus de perfection que les aultres: parquoy pour une qui faict bien toutes les aultres en sont honnorees comme anciennement de celuy qui gaignoit le prix de la lutte ou de la course es jeux olympiques, sa race en estoit eternellement illustree. Mais pour revenir a nostre premier discours elles font ce qu'elles peuvent pour captiver les coeurs des hommes & les piper par tant d'attraicts qu'elles les puissent avoir en leur possession pour tirer d'eux ce qu'elles en pourront avoir. Les autres pour se mocquer de leur inconstance & les autres pour s'en servir & en contenter leur appetit & bien souvent les faire tuer apres si elles peuvent. Brief ce n'est que toute malice qui habite en la femme & ne visent a aultre but qu'a tromper & decepvoir ceux qui ne se doubtent poinct de leurs embusches Et qu'ilz font comme les maladvisez & indiscretz mariniers qui attrappez du doulx chant des sirenes se destournent de leur droict chemin pour s'aller perdre au far de Messine. C'est pourquoy avec raison plusieurs Philosophes disent que nature ayant donné a tout animal son contraire elle a voulu aussi donner a l'homme a qui toutes autres choses sont assubjecties la femme pour son contraire & dont la malice est ennemye juree de la raison humaine, ceux qui parlent du mariage & de s'accompaigner avec la femme alleguent plusieurs belles instructions pour vous monstrer ce qui est en doubte. Car si tu consideres bien de prendre femme pauvre elle en sera mesprisee & toy moins estimé, si tu la prens riche elle te vouldra commander & de franc & libre te randre esclave, si que pensant espouser une compaigne esgalle, tu espouseras une insupportable maistresse. Je ne scai si je doibts dire diablesse puis si tu prens femme belle tu te mects en grand danger que ta teste ronde ne devienne fourchue qui est une espouventable metamorphose. Que dirons nous encores la richesse rend la femme superbe, la beauté la faict suspecte & la laydure la rend odieuse, je vous laisse a juger quel contentement il y peult avoir flottant tousjours en doubte parmy tant de dangers de faire naufrage, celuy disoit Hesiode qui se fie en femme est aultant asseuré comme celluy qui est pendant aux feuilles d'un arbre mesmement a la fin d'automne, auquel temps les feuilles commencent a cheoir. Il me souvient encores de trois choses que j'ay ouy reciter au mespris du mariage, le dire d'un facetieux, le faict d'un aultre & la responce d'un bon homme qui portoit propos de quelque mariage, on a raison disoit le premier de dire quant on veult marier un jeune homme qu'il le fault arrester, car de faict je croy que nous volerions jusques au ciel si cest arrest ne nous retenoit, l'aultre oyant precher qu'il failloit que chascun portast sa croix, pour estre sauvé, courut prendre sa femme & la charge sur son col, & le bon homme a qui on disoit qu'il falloit attendre que son filz fust saige pour le marier, ne te trompe pas amy luy dict il, car s'il devient sage il ne se mariera jamais, n'y ayant que deux bons jours en mariage, celuy des nopces, & celuy de la mort de sa femme, & aussi ce que disoit Diphile qu'une bonne femme une bonne mule & une bonne chievre sont trois meschantes bestes, ceux qui ont remarqué les malheurs dont ce sexe a esté cause en trouvent un nombre incroyable & en premier lieu alleguent la deception du premier homme par Eve sa femme c'est doncq le péché & la mort; que voudriez vous un plus grand malheur que celluy là: car toutes miseres s'en sont ensuivies & eurent deslors entree au monde Sanson trahy par Dalida celle qu'il aymoit & cherissoit plus que soy-mesme, & pour revanche de ceste amitié le vendit aux Philistins qui estoient ses mortelz ennemiz apres l'avoir desnué de sa force qui consistoit en ses cheveulx donnant coulleur a sa mauldicte trahison par pleurs & gemissemens pour en tirer la verité, l'ayant sceu elle le livra puis apres a la mort comme l'agneau au sacrifice, ses ennemiz l'ayant exercerent envers luy beaucoup de cruaulté voila la recompence de son amitié si forte, en apres Salomon abesty par ses concubines, luy qui estoit l'un des premiers hommes du monde en sagesse, en fin fut contraint ceder aux importunes caresses qu'elles usoient envers luy, & tant de mignardises attrayantes qu'il se laissa couler dans une mer de delices qui luy causa sa totalle ruyne, Achab ruyné par Jezabel, puis les histoires tragicques nous font veoir l'inhumaine cruauté de Pandore qui ne se contentant de son effrené apetit de vengeance avoir esté executé par ses propres mains en la personne de son Mary le pauvre enfant qui estoit au ventre de ceste cruelle mere en soufrit mort estant deschiré par pieces comme un Mouton tombant entre les griffes d'une Louve affamee (ha) pauvre petit enfançon ta destinee estoit bien rigoureuse de t'avoir formé au ventre de celle qui sans pitié ne compassion maternelle a eu le courage de te donner la mort de ses propres & meurtrieres mains, les Lions, les Tigres, les Ours & toutes autres sortes de bestes farouches qui se trouvent és desertz de Lidye, & d'arcadye ayment leurs faons, & toy mille & mille fois plus brutalle que tous ces animaux cy, as heu le coeur si felon de deschirer ta petite creature ta petite Image, ta semblance celle que tu as porté dans tes flancz, ceste cy est l'une des plus enormes cruautez qui se puisse imaginer. Helene qui a esté cause de la destruction de Troye la grande l'une des plus nobles anciennes & opulentes citez de l'univers & qui fleurissoit par sus toutes celles qui furent de son temps avec la mort de tant de peuples Tullia fut si extremement oultree de rage & de collere, qu'elle contraignit & força chevaux cochier & chariot de passer pardessus le corps de son pere gisant mort en terre, Antonius egal en l'Empire Romain avec Cesar ayant envoyé adjourner Cleopatra Royne d'Egipte pour se venir justifier de quelques cas qui luy estoient mis sus, elle y vint avec une pompe si desmesuree qu'elle est presque incroyable, puis y estant elle usa de tant de charmes mellez parmy sa beauté & bonne grace qu'elle le rendit entierement sien & si extremement passionné de son amour qu'il n'avoit bien que quant il jouyssoit de sa presence, & non tant seulement luy remit-il son offence mais la fit dame de pays innombrable, qui plus est l'amitié qui luy portoit luy feit folement soubmettre six vingtz mille hommes de pied & six cens Navires aux dangers de la mer & de la guerre, & sa personne & son honneur, s'estant a son occasion declaré ennemy de Cesar lequel le poursuivoit & mesmes l'avoit assiegé Antonius, pensant que Cleopatra l'eut trahy fit de piteuses plainctes, & voyant celle qu'il aimoit tant donna fin a ses jours se fourrant son espee dans le ventre voila comme il finit sa vie & elle peu apres estant mordue d'un aspic mourut, fut il oncques veu plus barbare cruaulté que celle de l'amoureuse Medee laquelle affin que plus seurement elle peust suivre Jason duquel elle estoit extremement amoureuse, espandit par le chemin les membres d'Absirte son frere qu'elle avoit taillé en pieces, a ce que par la doulleur que prendroit son pere de la mort de son petit fils cela le feist retarder en sa prompte suitte, elle mesme esmeue de rage pource qu'elle veit preferer les jeunes amours de Creusa aux vieilles siennes jetta aux piedz de Jason les pieces de deux enfans qu'elle avoit engendrez de luy, n'est ce pas une cruaulté extreme? Que feit Progné quand elle sceut que Philomene sa soeur avoit esté par Teree son mari indignement viollee ne luy presenta elle pas sur sa table les membres de son petit filz Itis pour les manger & devorer, a cause des foles amours pareillement Clytemnestra avec Egiste son Ruffien conjura la mort d'Agamemnon son mary & encores a l'occasion de ses amours & de ce meurdre fut esmeu la fureur d'Oreste Scille fille de Nisus donna au beau Roy Minos de l'amour duquel elle estoit eprise avec le poil d'or, ensemble la vye & l'Empire de son pere mais de ceste meschanceté la malheureuse fille fut punie, une courtisanne nommée Aspasie ayant semé a force femmes folles & de mauvais gouvernement par la grece les Megarois les ravirent qui fut cause que Pericles gasta, pilla, & brusla, la pluspart des villes & bourgs de la Moree; Hannibal chef des Carthaginois qui estoit le plus brave guerrier de son temps fut rompu par les delices des folles femmes Cappouane nous lisons de Pasiphee, laquelle non contente de l'embrassement du bel & puissant Roy Minos s'habandonna a un Taureau couverte d'une peau de vache Mais pour revenir a nostre discours est il chose (comme dict Plutarque) plus legere que la langue d'une femme effrenee, plus picquante que ses oultrages, plus temeraire que son audace plus execrable que sa mallignité & plus dangereuse que sa fureur? un noble Romain feit responce & bien apropos a quelques uns de ses familliers amys qui luy disoient qu'il avoit grande occasion de se tenir tresheureux & content pour avoir une femme belle riche & de nobles parens extraicte, il leur monstra son pied disant mes amys vous voyez que mon soullier est tout neuf, & bien faict mais il n'y a nul de vous qui puisse sçavoir en quel endroict il me blesse, Pythagore estant invité pour aller aux nopces d'un sien amy s'excuse disant, que jamais ne luy prendroit envye d'aller a tel festin, & se trouver a tel objet estimant qu'espouser une femme fust aultant qu'espouser un cercueil ou prendre un linceul pour le comencement de sa sepulture, l'ancien Adage ne dit il pas que femme & navires ne sont jamais si accomplies qu'il n'y ait tousjours a refaire? Dont je conclurois volontiers que si celuy qui se marie ne se fache, pour le moins il se lasse. Il y a encores un nombre infiny d'autres exemples sur ce subject comme Venus en Cippre, une Lays a Corinthe, une Thays en Alexandrie, une Phirné en Athenes, Rodoppe en Thrace, puis Semiramis Phedre Mirrhe, Biblis & Jocaste, & tant d'autres que je ne veulx nommer, car ce seroit une chose trop prolixe encores le poison, le venin, & la pestiferee humeur de ce puant & salle sexe, se font bien paroistre grandement pernicieux quand ils font aigrir le moult, mourir les plantes, tomber les fruictz des arbres avant qu'ilz soient meurs, toiller la glace des miroirs, amoussir le tranchant du fer obscurcir le lustre de l'yvoire corrompre l'air, mourir les essains des abeilles, devenir les chiens enragez & les enfans ensorcelez, voila en fin les perfections de ce sexe libidineux & plain de corruption tant des meurs que de l'interieur du corps. Tout ce que j'ay dict icy, ne prejudicie en rien aux saiges ains les rend de tant plus illustres & les faict resplandir comme la roze par dessus toutes les aultres fleurs des champs, se faisant admirer pour chose rare, digne de louange & de loz immortel. _Fin de la malice des femmes & non de leur meschanceté._ [NOTES CONCERNANT LA VERSION ÉLECTRONIQUE On a différencié les u/v et i/j conformément à l'usage moderne, et résolu les abréviations conventionnelles (de type bõne > bonne). L'orthographe et la ponctuation sont conformes à l'original, les coquilles les plus manifestes ayant toutefois été corrigées.] --- Provided by LoyalBooks.com ---